Meghalaya a·dokni Hills State People’s Democratic Party (HSPDP) aro United Democratic Party (UDP) dolrang, uamangni Regional Democratic Alliance (RDA) o bakrime kam ka·angkuna gong·gijaniko parakangaha.
UDP dol a·doko gnigipa dal·batsranggipa ong·a jean Meghalaya assembly-o ge 12 seat-ko a·kange dongenga aro HSPDP-o ge·gni seat-rang gnang. Khasi-Jaintia Hills-o chanatode chu·gimik 36 seat-rangoni uamang chu·gimik 40% ga·aka. Dolgni bakrime susaangahaoba RDA hajal 45,000 vote-rangkosan man·aiaha.
RDA-ni bakrimna gonggijani bang·a kattarang gnang, iani a·selo HSPDP dolrangba ong·katna nangnikenga ine UDP-ni Working President aro Cabinet Minister Paul Lyngdoh aganangaha. Da·o dipet dolgnini gisepo ekgrikaniko ku·sikchisan agankuenga jekon name tom·bimonge golpogrike bon·atsrangna nanggen ine Lyngdoh agandapangaha.
