A·dok sorkariko chalaianio dingtanggipa gadangona sokdoatnagita CM-Connect “Public Forum” ko NGH Adokgre-o da·al salni bako Chief Minister Conrad Sangma a·bachengate on·angaha.
CM-Connect-ko a·bachengate on·aniara, manderangni janggi tanganio neng·nikanirangko chagrongani bidingo u·ie ra·na man·agita Chief Minister an·tangan ia neng·nikanirangko naljokatna kamko ka·na ja·ku de·angenga. Iako dakaniara sakantinan u·iate, kakketaniko mesoke aro sorkari baksa manderangni bakrimaniko ra·baani ong·a ine Chief Minister Conrad Sangma aganangaha.
Indake manderangni neng·nikanirangko naljokatnagita, a·dokni, a·jani aro block level-ni Official-rang dongpae aganchakanirangko dakangaha. Indakgipa namgipa ja·ku de·anichi mikkangchi manderangni neng·nikani bidingo sing·doanirangko sengna nanggija biapon joljol talatanirangko man·agita amgen ineba Sangma aganangaha.
