SGH Rewak songo Suspension Bridge-ko ru·uta somoirangonin da·onaba taridape on·kujaenganina Karukol jolni Garo Students’ Union (GSU) dolrang a·jani DC-na chittiko sedoataha. Ian Karukol jolo songdongenggipa manderangna salantio nangana re·rurana jakkalgipa ge·sa kamkam Simsang chibimako kasotgipa dolong ong·a jean NH-217 oni Rewak aro gipin songrangona re·na jakkalgipaba ong·a ine GSU dol janapataha.
Ia dolong batanggimin 2022 bilsio chi dal·ani somoio nosto ong·ani a·selo jolni manderang an·tangtangni nanganirangna ringrangko jakkalna nangaona sokenga. Sorkari ia dolongko taridapnagita tangka paisarangko chamatgenchimoba da·onaba taridape on·kujaenga ine contractor-ni kosako matnangataha. Ia dolongko da·onaba matchote on·na man·janiara contractor an·tangni kamko simsakgijaniko mesokani ong·a jeni a·sel jolni manderang namen neng·nikaniko man·enga ineba GSU dol janapataha.
Ia dolongko taridapanio ru·utatanichi salantio nangana re·ruragipa manderangni jangginasan kenchakani ong·aigija skul aro college-o poraienggipa chatro chatrirangnaba kenchakani ong·enga maina mikkarang jimbee wagenchim ong·oba ringrangko jakkale chibimako batsotna nangenga ine u·iatangaha. Indake jolni manderangni namgnina aro naljoke rakkina man·agita daito donggipa dilgiparangko ta·rake nirokate kamrangko ka·china GSU Karukol dolrang a·jani DC ko mol·molataha.
