Re·anggipa June jani 18 tariko manderangko silai jotdike dacoit dakanio tangka gong hajal 80, gamchatgipa lekka pancharang aro ge·gni mobile phone baksa sim card rangko ra·seke katanio jak donggipa manderangko rim·na man·aha ine North Garo Hills ni pulis dolrang koborna parakataha. Koborna parakatanigitade ia kamo jak donggipa manderang Aprilia Scooty (AS18J-0181) aro gisim rongni Bajaj Pulsar 220 (AS18 E-7925) bolgnio re·bae dacoit dakangaha ine u·ina man·aha.
Indake ong·engon ua apsan salni attam mangni somoio Beldongpara songo jean PO Choto Matia, PS Krishnai, Goalpara, Assam niko uamangni bike bolsako rim·rikna man·angaha jeon dosi dakgipa manderang ua biaponi kate jokangna man·angskaaha. Rim·rikna man·gipa bike-ko Mendipathar thana-ona ra·ange donangaha aro uamangni kosako a·selo ga·akgipa manderang Case No. 09(06)2024 U/s- 392 IPC, R/w. Sec. 25(IA)(IB) Arms Act-o pangchake badiko ka·angaha.
Ia obosta ong·ani gisepon Dy SP, Special Ops aro North Garo Hills D.E.F ni dolrang sepang joloniko am·sandianirangko dake June 24 tariko dosi dakgipa saksa Sunil Boro ko rim·na man·aha. Sunil Boro bilsi 33 ong·gipa Upper Borgum, PO/PS Dudhnoi, Dist. Goalpara, Assam-o songdonggipa aro (L) Rajendra Boro ni depante ong·a ine ma·sina man·aha jekon uni scooty baksa Dhupdhara PS ni ning·o ong·gipa biapniko rim·na man·angaha. Ua somoio gipin bak donggipa manderang jemangan Dudhnoi jolni Kaltu Rabha, Turti Basumatary aro Sahadev Basumatary biap oni kate dongna man·e jokangaha.
Iani gisepon pulis dolrangni chotchanggija am·sandianirangko dakanichi Rita Basumatary ni segipa Turti Baumatary jean Buglamari, PO Lela, PS Dudhnoi, Goalpara, Assam o donggipa pulis dolrangna ge·sa semi-automatic pistol aro guli ronggni baksa an·tangko bame on·angaha. Uko rim·na man·anichi Sahadev Basumatary koba Tikrikilla sepangni Assam-Meghalaya sima ari joloniko rim·na man·skaaha.
Dacoit dakanio sakgipin bak donggipa mandeko da·onaba rim·na man·kujani gimin am·sandianirangko dakangkuenga ine u·iatangaha. Ia sakgittam manderang re·anggipa changrangoba Assam aro Meghalaya a·dokrangni manderangko indake kenate dacoit ka·anio bakrang dongangaha ineba North Garo Hills ni Superintendent of Police aro IPS Pawar Swapnil Vasantrao u·iatangaha.
