SWGH a·jao Damalgre-oni Mellim-ona re·gipa ramao dolong rikenggipa matchotkujani a·selo songdongenggipa manderang neng·nikaniko chagrongangaha. Ia dolongko re·anggipa bilsi 2 bataonin rikna a·bachengaha jekon indita ru·utbegenchimoba da·onaba matchote tarie on·kujaenga.
Mikkarang jimbee chirang dalanganichi skul, college aro office re·giparang re·na dona neng·nikaniko chagrongenga. Skul re·gipa bi·sarang rikenggipa dolongo jang·kerangko chane re·na nangaonaba sokaha ine niknagita man·angaha. Iasan ong·aigija dolongko tarimankujani a·selo salantio bading chiwale aro game ge·e cha·enggiparangnaba sinjetaniko on·angaha. Da·ogita wachi karirango chirang dal·genchimode skul aro college re·gipa bi·sarang champengataniko man·a.
Mikkangchi ia jolni manderangna neng·nikanirangko ra·bajanagita dolongko ta·rake tarie on·china songdongenggipa mande saksa koborna janapataha.
