SGH Nengkong, Emangre, Karukol, Dalenggitim, Halwa Atong, Rewak aro sepangjolni songrango bijoliko watani tik ong·jaenga aro bijoli den·simsimanina jolo songdongenggiparangni palo GSU Karukol Regional Unit dolrang a·jani Deputy Commissioner-na chitti sedoataha. Meghalaya a·dokko man·aoni bilsi 50 batpilahaoba da·onaba janapgimin songrango salantio bijoli den·anirangko dakani a·selo nangagita jakkalna man·jae neng·nikaniko man·enga ine janapataha.
Uamang maini a·sel bijoli den·simaniko dakengani bidingo adita talatanikoba on·ataha. Skanggipao MeECL Department-o kam ka·giparang chu·onggijani a·sel, wachi karini somoirango mikka balwana nosto ong·gipa bijolini krong aro silitingrangko songni manderangsa taridapna nangao ga·akenga ine janapataha. Gnigipao, daito donggipa department-rang chi dal·ronggipa biaprango mangrakgipa bijolini krongrangko songjani a·selo wachi karirango chi bana ong·jokode nengraen gitdilrongani giminba bijoli donggijani mingsa a·sel ong·a ineba janapataha.
MeECL department-ni kam manderangna bijoli watanisan ong·aigija transformer, bijoliko sale on·gipa krong aro silitingrangko nirokaniba ong·a ine janapangaha. Indake ong·genchimoba Mandang Nengkong aro Konagittim Karukol jolni transformer-ko anti gni ba gittam ong·angpiloba tarie on·kujaengani a·selo songdonggipa manderang andalao janggi tangna nangenga ineba u·iatangaha. Ian MeECL department-ni chu·gimik simsakgijaniko aro tarigija galchipe donengani ong·a ine uamang matnangataha.
Una agreba daito donggipa department-o kam ka·gipa mande komianichi salantio bijoli den·anirangko dakengama ine uamang sing·doan baksana jolo songdongenggipa manderang maming neng·nika gri bijoliko name jakkalna man·agita nirokatchina GSU Karukol Regional Unit dolrang mol·molataha.
