Tura songjinmao rikenggipa P A Sangma stadium ni pakma bewakgipani bidingo RTI ka·anio sing·anirangna Deputy Commissioner office-oni aganchakna jechakaha ine Tura-ni MDC Bernard Marak parakataha. RTI o sing·anirangko name sranggipa ong·ja ine Public Information Officer (PIO), aganchakangskaaha. A·jani skotong office-oni indakgipa bewalrangko mesokode gipin department rangoniko February 12 o RTI ka·giminna aganchakaniko man·a ka·dongsoani dongja ine Marak matnangataha.
Marak, RTI ka·anio P A Sangma stadium-o rikenggipa pilak project-rangni Detail Project Report (DPR), ma·mongni chu·gimik chamatgimin tangka paisarang aro baditana tangkarangko oke jakkalaha, unbaksana project-rangko kam ka·ani aro matchotna dongimin sal somoirangni bidingo sing·doangaha. Iasan ong·aigija, batanggimin chango ia dikdiksana rikgipa pakma be·wakgipani bidingo am·sandiani aro ja·ku de·aniko sing·angaha. Bon·kamao, be·wakgipa pakmani DPR aro sawa ia kamko ka·na chamatani bidingo RTI ka·anio sing·angaha.
Deputy Commissioner Office oni sing·anina aganchakna sikgijaniko mesokaniara RTI Act ni dongimin niamko pe·ani aro maming parake kam ka·ani dongja ine Marak matnangataha. Batanggimin chango skanggipa pakma be·wakgipako mokordoma ka·ani bidingoba maming ja·ku de·aniko nikjaha aro ia pakmarangni a·selo jolo songdongenggipa manderangna namen neng·nikaniko man·enga ine Marak aganangaha. P A Sangma stadium-ni mamlako ma·mongona ra·doanggen aro niamgita dakna nanganirangko dabianggen ine Marak parakataha.
