Batanggimin somoirangoni Sonja Wildlife Rescue Centre, Tura-o donenggipa hurorangko, Ri-bhoi a·jani Umtrew-o gital tarigimin Meghalaya State Zoo-ona ra·anggenok ine a·dok sorkari parakataha. Ia hurorangko ra·angnasienganiko parakataniara batanggimin somoirango Garo Hills-ni manderangni Wildlife Rescue Centre Tura-oniko gipin a·dokchi ra·angna am·anina jegalatani bidingo ong·aha.
Sorkarini talatanigitade, Umtrew-o Meghalaya State Zoo donggipara Central Zoo Authority (CZA) ni ra·chakgimin ong·a aro nanggipa rika cho·anirangko matchotnasiengaha ine parakataha. Indaken Phan Nonglait Park-oni adita matburingrangkoba ia gitalgipa zoo-ona ra·banagita man·aha. Unbaksana jensalo ia gital zoo-o kam ka·nasienggipa aro niroknasienggipa manderangko rimnapani joljolan chalaigenok ine u·iatangaha. Una agreba ia hurorangko Garo Hills-ni buringoniko ra·angjaenga indiba Sonja Wildlife Rescue Centre Tura-onikosa ra·angenga ineba u·iatangaha.
Tura-o donggipa Sonja Wildlife Rescue Centre-ko ru·uta somoirangonin chalaienga jean matburingrangni dongchakram biap ong·ja aro matburingrangko naljoke donchakgipa damsa biapsa ong·a. Unbaksana ia Rescue Centre CZA ni ra·chakgimin ong·ja baksana CZA-ni dongimin niamrango chu·onggipa ong·ja ine u·iatangaha.
Ia hurorangko ru·uta somoirangonin Rescue Centre-o done manderangni nirok simsakaniko man·e uarangko buringona watatpilode am·e cha·na changjawaha aro janggi tangna neng·genok ine janapataha. Indake ong·ani a·selosa ia hurorangko dingtang dingtang CZA-ni ra·chakgimin zoo-rangona ra·ange uarangna mikkangchi nanggipa nirok simsakaniko on·a man·agita ra·angenga ineba janapangaha.
