South Garo Hills-ni nangrimgimin NGO dolrang jekai AHAM, ADE, AYWO, FKJGP, GSU, NGCO, songni Nokmarang aro songdongenggipa manderang ru·utbea bilsirangna ramarangko tarigija galchipe donenganina Gasuapara kal·chakram biaponi C&RD block-ona re·jomaniko dakangaha. Pilak ong·anggimin sorkarirang uamangni a·jako galchipe donanina ding·chaoe da·alo sakantian jolko namdapatchina ramarango re·jome dabina nangaona sokaha. Indita bilsina tarigija donanichi ia ramarang a·kilok gapgipa, re·na dona namgijagipa aro nosto ong·batsranggipa rama ong·angskaaha ine NGO dolrang parakataha.
Re·na dona neng·nikataniko man·ani a·selo nangana re·ruraenggipa manderang sima ari jolgita BSF rangni re·gipa sima ari ramarangko jakkalanichi ka·namgijagipa buringni Mongmarangkoba chagrongaona sokenga. Ia ramako tarina sorkarioni ku·chakanirang donggenchimoba, tarichipgija ru·utate donganian mingsa dal·bea gualani ong·enga ine parakataha.
Gasuapara song Baghmara administration-ni ning·o ga·aka. Da·o ong·enggipa MLA Independent-o chegipa Kartush Marak ong·a aro ua NPP baksa bakrimaha ine NGO dolrang parakataha. Ia ramarang skangna baten namjabatgenchimoba jako ra·e kamko ka·enggipa MLA onikoba maming dakchakaniko man·ja ine uamang agandapangaha.
Ia ramarang ru·uta bilsirangonin namjagenchimoba darangba niroke jako ra·e kam ka·gipa dongja ine songdongenggipa manderang aganangaha. Ramarangko nirok simsakgijani a·selo songdongenggipa manderang bang·a neng·nikanirangko chagrongna nangaona sokenga. Dingtang dingtang nanganirangna jekai sanna bannaniko dakna Baghmara-ona ra·angna nanggenchimoba ramarang namjani a·selo garirang re·na man·jae sagipa manderangko sanchakram a·damona rimangna man·jaenga. Iasan ong·aigija, ramarangko salantio re·ruragipa songni manderang, bading chiwalgiparang, skul, college aro office re·giparangnaba neng·nikaniko ra·baenga ine kobor ra·timgiparangna parakataha.
