A·chik Holistic Awakening Movement (AHAM) CEB aro Northern zone baksa dingtang dingtang regional unit-rang, Mendipathar merchant association-ni kosako Mendipathar Police station-o badi ka·angan baksana North Garo Hills-ni Deputy Commissioner aro Additional Superintendent of Police Officer-na uamangni ong·gija kamrangni bidingo u·iate mijal salni bako lekka see on·angaha.
Batanggimin 2023 bilsion Mendipathar Bajar-ni Merchant Association-rang baksa AHAM Northern zone-rang tom·bimonge chanchirime kam ka·e cha∙enggipa me·chikrangna naljokani aro kamoniko somoigita watani bidingo u∙iate on·manaha ine janapataha.
Unbaksana a·palchini re·bagipa manderangko kamna rakkion uamangni nangchongmotgipa lekka pancharangko Xerox ka·e rakkie donchina aro Police Station-o on·echina u·iatmangenchimoba, Mendipathar Bajar-ni merchant association-rang maming namdapatani ja·kurangko de·jaha aro batesa bajar-ona a·gital manderangko skatang bading chiwalna on·e songdonggipa manderangna neng·nikanirangko on·enga ine u·iatangaha.
Uamangna GHADC-ni Trading by Non-tribals (TNT) Certificate-rangkoba am·sandie niroke kamrangko ka·na u∙iatmanahaoba uamang an·tangtangni skagita Mendipathar Bajar-ko chalaianichi A·chik a·songna so·sojengjeng ong·anirangko ra∙baenga ineba janapataha. Batanggimin antirangna skang gimagipa A·chik metra me·chik bi·sako am·sandina man·inggijani ja·pang ja·dilba Merchant Association-ni simsakgijani a·selsa ong·aha ine AHAM dolrang matnangataha.
Ia pilak obostarangko niate GHADC ta·rakkale Mendipathar Bajar-ona TNT certificate-rangko nirok sandiechina AHAM dolrang u·iatangaha.
