A∙dokni je bijoli sokkugijagipa songrangona 2028 bilsina skang bijoliko sokatgen ine Power Minister AT Mondal mijal salo aganangaha. Ia kattarangko Mawhati-ni Congress MLA Charles Marngar aro uni manderang baksa Power Minister-ko gronge uni constituency-ni ning·o ong∙gipa songrango bijoli watanirang tik ong∙gijanina, mittam songrangona bijoli sokujaengani gimin aro bijoli silitingrangko sale on∙manahaoba bijoli watkujaenganina nirokatchina didiangani ja·man parakataha.
Marngar-ni janapanigitade, uni constituency-ni ning·o ong∙gipa Mawhati, Sonidan, Umtrai aro Umsiang songrango bijoli watanirang tik ong∙jaenganina Power Minister-na u·iatangaha. Apsandaken 2018-19 bilsi jolo Makdoh, Muska, Amjong, Markhangduba, Amdubighat, Amphreng aro Nongthymmai Makdoh songrango DDUGJY-I ni ning·o bijoli silitingrangko sale on∙anirangko matchotahaoba bijoli wataniko den·e donpilaniko Marngar janapangaha.
Iarangna aganchakniko dakengon Power Minister AT Mondal 2028 bilsina skang bijoli sokugijagipa songrangona bijoliko sokatna ku∙chakangaha. Indake ong∙enggon Department-ni gita bijoli sokugijagipa songrangko sandianirangko dake bijoliko sokatna kamrangko ka∙engaha ine Mondal aganangaha. Unbaksana mittam songrangko napatna nangkuenga maina songgital nokgital rike donggiparang bang·en dongani gimin uarangko naptna kamko ka∙na nangkuenga ineba Mondal agandapangaha.
