Tura Football League Super Division-ni final kal·susaaniko da·al attamo P A Sangma Sports Complex-o kal·atangaha. Ia kal·aniona Sports Minister Shakliar Warjri mongsonggipa ong·e sokbae West Garo Hills-ni District Sports Officer aro District Football Association, Tura-ni President Saljagring M. Marak, Sanjay Sangma aro Selsella-ni MLA Arbinstone Marak-ba dongpae bakko ra·angtokaha.
Ia Super League Division ko dingtangmancha District Football Association, Tura a·jao robol kal·aniko namdapatna a·bachengdilaha. Una agreba Tura Football League-o First aro Second Division-ni bako kal·atanirangkoba batanggipa antirangonin nikangna man·enga.
Da·alni final kal·susaanio Super Division-ni nambatsranggipa dolrang jean Chipakkore FC aro Selsella SA-ni susagrikanio bang·a robol kal·aniko nina namnikgipa manderang bakko ra·angtokaha. Kal·ani skanggipa half-o Chipakkore FC-rang biltinggrike kal·e mesokange skanggipa goal-ko Brainsbirth G. Momin chipangenchimoba Selsella SA-ni Chichang Momin-ba doltangna goal 1 ko chipe on·a man·angskaaha.
Kal·ani gnigipa half-o Chipakkore FC-ni Brojen Muchahary goal chipna man·taianichi chu·gimik somoio 2-1 goal-rangko man·e Chipakkore FC chegipa ong·angaha. Ia final kal·susaanio chegipa dol jean Chipakkore FC trophy aro certificate-rangko man·an baksana tangka gong lakh 2 koba man·angaha. Gnigipa biapko man·gipa Selsella SA trophy aro certificate rangko man·an baksana tangka gong lakh 1 ko man·angskaaha.
Una agreba kal·anio namgipa player rangnaba adita boksisrangko on·angaha jeon Player of the Final-ko Easter Salchang Ch. Sangma, Best Goal Keeper-ko Jaksram B. Marak, Best Defender-ko Simprang M. Marak, Best Midfielder-ko Chichang Momin, Best Forward-ko Brainsbirth G. Momin, Top Scorer-ko Akim R. Sangma, aro Player of the tournament-ko Easter Salchang Ch. Sangma an man·angtaiaha. Ia boksisrangko man·anggipa player-rangna trophy baksa tangka gong 5,000 ko on·angjolangaha.
