District Level Inter School Subroto Mukherjee Cup Football tournament-ko Chandmari-ni football kal·chakramo da·al salo bon·kame kal·angaha. Ia kal·aniko bilsi 15 aro bilsi 17 ni ning·o ong·gipa me·asarangna aro bilsi 17 ni ning·o ong·gipa me·chik dolrangna Tura District Sports Officer ong·atangaha.
Ia tournament-ko June 6 tarikoni a·bachengataha jeon West Garo Hills a·jani ge 15 school-rangni kal·susagiparang jerangan bilsi 17 ni ning·o ong·gipa me·asarang kal·anio bakko ra·angaha. Ge 8 school-rangni bilsi 17 ni ning·o ong·gipa me·chikrang aro ge 9 school-rangni bilsi 15-ni ning·o ong·gipa me·asa dolrang bakko ra·e kal·angaha.
Bilsi 17-ni ning·o ong·gipa me·chikrangni kal·anio Tura-ni Dalia Secondary School chegipa ong·aha aro Government Boys’ Higher Secondary School gnigipa biapko man·an baksana best Player award-ko Niksera Ch. Marak man·angaha. Bilsi 15-ni ning·o ong·gipa me·asa dolrangni kal·anio Tura Government Boys’ Higher Secondary School cheani trophy-ko man·angaha aro Monfort Centre for Education gnigipa biapko man·angskaaha. Government Boys’ Higher Secondary School-ni Mallenga N. Sangma best player-ni gadangko man·angskaaha.
Bilsi 17-ni ning·o ong·gipa me·asa dolrangni kal·anio Montfort Secondary School Dilne Bolchugre cheangaha aro Montfort Centre for Education gnigipa biapko man·angaha. Best player award-ko Monfort Secondary School Dilne Bolchugre-ni Chando Ch. Marak man·angaha.
Ia bon·kamgipa kal·ani salo Retd. Deputy Director Jasper P. Marak, District Social Welfare Officer Silje A. Sangma aro District Sports Officer Saljagring M. Marak-ni jakchi kal·anio chegiparangna award-rangko on·angaha. Unbaksana ia District level tournament-o kal·e chegiparang State Level Subroto Mukherjee Cup-o West Garo Hills-ni palo kal·angna cholko man·angskagen.
