Mijal attam walni 9:30 mangni somoio Bajengdoba jolni dolbonga NGO rang chong·motan APA, AAYF, ASWA, Matgrik Domesal aro FAF apsan bakrime NH51 oniko Alto ML 06A 0528 gario bol badingsruke salangenganiko nike uko rim·na man·aha. NGO dolrang rim·a man·gipa gari aro bolrangko Mendipather Range Officer na pakwatangaha.
Ia niamgri bol badingsrukanirang salantio batroroenganina Bajengdoba-ni bakrimgimin NGO dolrang Forest Department rakka ja·ku de·e nirokaniko dakchinagita didiangaha. Indake niamgri bolrangko badingsrukaniara Garo Hills-ni gamjinko rusiani ong·a aro ia kamko ka·enggiparangni kosako rakka ja·kuko de·angnagita Bajengdoba-ni bakrimgimin NGO dolrang mikrakkataniko on·angaha.
