A·songni skotong songjinma Delhi-ni Chief Minister, Arvind Kejriwal-na Delhi court bail-ko on·angaha. Kejriwal-ko excise policy-ni bidingo tangkarangko jakkalsretanina skanggipa March 21 tariko Enforcement Directorate (ED) rim·aha. Ua bail man·e ong·katbae Lok Sabha election-o wenangaha jeon interim bail-ni somoi matchotani ja·mano ua an·tangko June 2 tariko on·kangetaiaha.
Kejriwal-na bail on∙giminko konta 48 na ra·doatna Enforcement Directorate-ni agananiko court-ni Special Judge Niyay Bindu ra·chakjaha. Indake ong·genchimoba, ED re·baenggipa June 22 tariko Delhi High Court-ona Kejriwal-ni bail-ni bidingo ra·doangnasienga.
Delhi-ni Health Minister, Saurabh Bharadwaj-ni agananigitade, court-ni Arvind Kejriwal-na bail on·anian niamko ja·rikanio dal·begipa dakmesokani ong·a aro ian ma·mong sorkario uni kosako sakki donggijaniko mesokani ong∙a ine parakataha. Iasan ong·aigija INDIA bloc-ni bang·a dilgiparang uko rimchaksoani kattarangchi social media-rango nama skanirang on·aniko nikangaha.
