West Garo Hills, Selsella block ni ning·o chi bana ong·e nokrangko rusiata man·e relief camp-o donggipa manderangna PHE Minister Marcuise N. Marak, Selsella ni MLA Arbinstone B. Marak, cha·anirangko aro ringani chirangko sualangaha.
Selsella jolo damgittam songrangko chi dubiangaha, mongsongbate Rajangola aro Haldibari-o bilongbate ong·angaha. Ia songni manderangni nok jamrang namen rusiatako man·aha, jekon District Administration nirokate sorkarini nokrango dongchakatengaha.
Ia somoio, PHE Minister aro Selsella ni MLA, jolo chi bana ong·e neng·nikani bidingo pilak officer rang baksa Civil SDO, Sumit Kumar ni dongpaanio tom·e chanchijolangaha. Relilef camp rango dongenggipa manderangna chu·ongagita cha·ani aro ringani bosturangko sorkarioni sokatnagita uamang chanchirimangaha. Mikka wachi karirango dingtang mancha simsake aro naljoke dongchinaba uamang manderangna ku·pattianiko on·angaha.
