Police department ni minggittam gitalgipa niamrang ba Criminal Code rangni bidingo district official rang nanggipa u·ianirangko man·e niamko name jakkalna man·agita salgnini training program-ko Tura Circuit House o Meghalaya Administrative Training Institute (MATI), Shillong ong·atangaha.
Ia training ko Bharatiya Nyaya Sanhita (BNS) 2023, Bharatiya Nagarik Suraksha Sanhita (BNSS) 2023, aro Bharatiya Sakshya Adhiniyam (BSA) 2023 o pangchake ong·ataha. Meghalaya a·doko ia gital code rangko July 1 tarikoni a·bachengatgen.
Law Department ni Secretary, Shany N Sangma, minggittam gitalgipa Criminal Code rangni bidingo ning·tue talatangaha aro ia niamrangko maikai jakkalna nanganirangko aganangaha. Bharatiya Nyaya Sanhita ni bidingo West Garo Hills district, Tura ni Public Prosecutor agan talatangskaaha.
