Salsani Legal Awareness program ko West Garo Hills a·jani Balamagre antio District Legal Services Authority, West Garo Hills, Tura aro Meghalaya State Legal Services Authority bakrime da·alo ong·atangaha. Ia program ko dingtang mancha songni manderangna Disaster Management Act 2005, Protection of Women from Domestic Violence Act, 2005 aro Free Legal Aid and Free Legal Services ni bidingrango agan talate on·a ong·atangaha.
Ia Legal service ni miksonganiko aro manderangna gamchataniko talatange, Disaster Management Act 2005 ni bidingo John Crownin Ch. Sangma aganangaha. Ia Act nigita a·sel obostarang ong·anio jekai chi bana, a·a ruronge aro gipin a·selrango manderang chagronggenchimode sorkarini dakchakanichi nok jam nosto ong·giparangko rikpiltaina cholko on·a ine Sangma talate on·angaha.
Una agreba “Protection of Women from Domestic Violence Act 2005” o janapgimingita me·chikrangko doka satanio ba maiaba a·sel o jangnanggenchimode sepangbatgipa thana ona re·ange badi ka·china didiangaha jekon daito donggiparang officer rang dosi dakgipani kosako kragipa ja·kuko de·e sastiko on·anggen ineba u·iatangaha.
Unbaksana Free Legal Aid and Free Legal Services nigita kangal cholgrirang kosako janapgimin a·sel obostarango ga·akgenchimode, uamangni man·a kraa ba kragijako nigrike dakchakaniko ra·na man·gen ine talatangaha. Mikka jimbee wagenchimoba ia programo adita anti cha·na re·bagipa manderang bakko ra·angtokaha.
