North Garo Hills-ni saksa A·chik chadambe Prangkybirth M. Momin, International Grappling Wrestling Coach/Referee/Player-na Training Seminar 2024 ko Shimla-o ong·atgipao bakko ra·e National Grappling Wrestling Coach-ni License-ko man·angaha. Ia license-ko ua Shimla-ni Superintendent of Police (SP) Vinod Kumar-ni jakchi on·aniko ra·chakangaha. Ia training seminar-o Momin-na National Coach License-ko pakwatani somoio WGCI-ni Chairman Dinesh Kumar Kapoor-ba dongpae bakko ra·angaha.
June 13 oni 17 tarikona ong·atgipa International Training Seminar-ona saksa International Coach & Referee Zaharov Ilya United World Wrestling-ni India-ona re·bae Shimla-o skie on·angaha.
Prangkybirth M. Momin, North Garo Hills Daram Tekalang-oni chadambe ong·a. Ua saksa Free Style Wrestling-o skanggipa bakko ra·chenggipaba ong·a. Prangkybirth re·anggipa changoba 5 gipa Meghalaya Games Tura-o Garo Hills-ni chadamberangna Free Style Wrestling training-ko on·e ua an·tangan Garo Hills-ni Free Style Wrestling Coach-ni kamko ka·e skie on·angaha.
