Meghalaya State Education Commission (MSEC) baksa Garo Hills-o donggipa pilak School aro College-rangni Principal-rang MBOSE-ni Conference Hall-o tom·e chanchirimangaha. Ia tom·aniko ong·atani miksonganiara poraiani a·bao neng·nikanirangko am·sandie namdapatana ja·ku de·e kam ka·na ong·atangaha.
Ia tom·aniko Education Minister Rakkam A. Sangma dilangaha. Unbaksana Education Department-ni Adviser H M Shangpliang, MSEC-ni Chairperson Professor S M Sungoh, Adviser aro UPSC-ni gitcham Chairman David R Syiemlieh, Education Department-ni Secretary Ambrose Ch. Marak, Executive Chairman C P Marak aro West Garo Hills-ni Deputy Commissioner Jagdish Chelani-ba dongpae bako ra·angtokaha.
Tom·anio School aro College-rangni Principal-rang an·tangtangni nangnikani aro neng·nikanirangko aganangengon, iani bidingo Commission-ni gita ja·mano sorkarina report tarie on·angna aganangaha.
