Meghalaya a·doko Tourism-ni a·bako namdapatna gong 5,000 crore tangkarangko jakkalanggen ine da·al salo ICFAI University Meghalaya-ni convocation-o bakko ra·miting somoio Chief Minister Conrad Sangma parakataha. Ia tangkarangko jakkale mikkangchi a·doko ge 50,000 kamrangko nakatatna dakchakanggen ineba Sangma aganangaha.
Una agreba IT sector-na gong 1500 crore ko jakkale ge 20,000 kamrangko nakatdapatna ka·dongsoenga ine Sangma aganaha. Indake ong·engon chadamberangko chasongni kri dingtanganio an·tangtangko tarisamsona aro gitalgipa kamrangna tikkelchinaba didiangjolangaha.
IT sector-ko namdapatanichi a·dokni kona noksik biaprangona optical fibre-rangko sokatna man·gen. Iako ka·anichi songadamrangoba mikkangchi poraia skiani gadangrangko tang·doatna dakchakanggen ineba Sangma agandapangaha.
