A∙dokni manderangna Reservation Policy ni bidingo ku∙pattiani ba agane on∙aniko nangnike Reservation Policy-ni Expert Committee-ni Secretary, MCS, L.K. Diengdoh-na Association for Democracy and Empowerment (ADE) dolrang chitti see adita neng·nikani aro nangnikanirangko u∙iatangaha.
Meghalaya-o songdongenggipa dingtang dingtang jatni manderang a∙dokko man·chengaoni da∙ona kingking apsan melie bakrime dongenganiko niknagita man∙enga. Iani gisepon Constitution of India ba niamni ki∙tapo dingtang mancha pilak chonchongipa jatrangna aro economically backward ong∙giparangna reservation-ko segataha aro iani gitan da∙o chonchongipa jatrang aro economically backward ong∙gipa biaprangni tang·dobaaniko nikna gita man∙engaha ine ADE dolrang janapangaha.
A∙dokni Reservation Policy-ko niatgenchimode Garo-rangna 40%, Khasi aro Jaintia-na 40%, OBC na 5% aro Unreserved na 15% kamrangna rimpna tariangaha jeon pilak Meghalaya-o songdongenggipa manderang maming neng·nikanigri melie nangrime donganiko nikna man∙enga. Indake ong∙enggon je a∙dokni Reservation Policy-ko 12 January, 1972 bilsio ra∙gatgiminko maming dingtangataniko dakgija apsan dake donangkuchina ADE dolrang mol∙molangaha.
Khasi aro Jaintia-rangko niatgenchimode Garo-rang poraianio, skul aro college-rangni gadango da∙onaba namen jamanchakuenga ine ADE dol janapangaha. Iani gisepon reservation policy-ko dingtangatode namen gisik saaniko aro so·sojengjeng ong∙aniko ra∙bagen ineba janapangaha.
Indake ong∙enggon Reservation Policy-ko dingtangatgenchimode a∙dokni pilak jatni melie nangrime donganiko so·sojengjeng ong∙ataona sokataniko niksamsoe, je niamkon 12 January, 1972 o segatgimin Reservation Policy-o maming dingtangataniko dakgija apsankon donangkuna ADE dolrang mol∙molangaha.
