Lok Sabha election result-ko parakatani ja·man BJP, NPP baksa a∙doko da∙o bakrime sorkariko chalaigenchimoba mikkangchi mai ong∙gen iani gimin darangba agansona amja ine BJP-ni dilgipa aro South Shillong-ni MLA Sanbor Shullai aganangaha. NPP a∙doko bang·bata MLA-rangko man∙e sorkariko chalaienga jeon BJP-ni sakgni MLA bakrimaniko on∙enga. Iani gisepon ma∙mong sorkariko BJP chalaiengon, ma∙mong sorkari baksa chaprimna re∙anggipa Lok Sabha election-o NPP saksakoba MP cheatna man∙jaha ine Shullai aganangaha.
A∙doko BJP LS election-o susana darangkoba on∙gija NPP-na ge·gni MP seat-ko wate on∙an baksana NPP-na chakpaaniko on·aha. Indake ong∙enggon NPP uamangni bilakbegipa seat Tura jeon Agatha K. Sangma, MP ong∙e dongengachim aro Shillong-o Dr. Ampareen Lyngdoh, jean a∙doko minister ong∙engachim sakgnian bang·a vote-rangchi sirikaha. Unbaksana a∙doko NPP-rang bang·bata constituency-rango sirikaha aro ian NPP-na namen mikrakatani ong∙an baksana mikkangchina kensoaniba ong∙enga ine Shullai agandapangaha.
