Da·al June 9 tariko, Narendra Modi gittamgipa changna Prime Minister ni kamko jako ra·e ka·angtaina Rashtrapati Bhavan o attamni 7:15 somoio ku·mitchetaniko dakanggen. Ian India a·songni itihas o gittamgipa changna Prime Minister ong·anio gnigipa ong·enga, jeon 1952, 1957 aro 1962 bilsirango Jawaharlal Nehru ba changgittamna PM ong·angaha.
Narendra Modi ni ku·mitchetangani ja·mano gipin sak 30 mang Council of Minister rangoni dal·dalgipa portfolio rang jekai home, defence, external affairs aro finance ni Minister rangna ku·mitchetangnaba gnang. Gipin gamchatgipa infrastructural ministries jekai steel, civil aviation aro coal rangko jako ra·nagipa Minister rangkoba da·alan ku·mitchetangna ka·dongsoenga.
Ia chango, BJP seat rangko man·anio bilsi 10 ni ja·mano chu·onggijaniko chagrongaha jeon NDA baksa bakrimgipa Nitish Kumar ni JDU aro Chandrababu Naidu ni TDP dolrang adita dal·gipa Minister rangna dabianggen. Unbaksana, gipin dilgiparangnaba iani gisepon kamrangko tikate sualangna nangenga. Iani bidingo da·alo ku·michetanganiko dakani ja·mano nambate tale u·ianggen.
Da·al, ia ku·mitchetani salo gipin a·songrangni Prime Minister rangba re·bae bakko ra·angtokgen.
