Lok Sabha election-ni result-ko parakatani ja·man adita salrangna skang Assam a·dokni CM Himanta Biswa Sarma, election-o susaanio BJP dolni Meghalaya, Manipur aro Nagaland a·dokrango chu·sokgipa ong·janina mikkang ki·sang chanchigija matnange agananiko ra·chakna man·gijani ong·an baksana a·dokni manderangko chonnikani ong·a ine saksa social activist Cherian Momin jegalataha. MP election-o NDA dolni janapgimin a·dokrango chu·sokgijanina ra·chakna man·jae Sarma Christian Missionary-rangko matnange aganahanina, an·tangni a·dokko niroke dongani palo gipin a·doko jaksi otjachina Momin raken jegalataha.
Sarma-ni Christian Missionary-rangni kosako maming sakki donggija matnanganiara a·songo democracy-ni gamchataniko aro dingtang dingtang jat toromrangko dal·e ra·gijaniko mesokani ong·a. Uni party-ni chu·sokgipa ong·janina toromko pa·sike matnange agananiara, a·dokni manderangko bak ong·ate namgijaona ra·baani ong·a jekon ra·chaknagita man·gipa katta ong·ja ine Momin aganaha.
Unbaksana Sarma saksa Assam a·dokni CM ong·pileba an·tangni kamrangko aro katta aganako nigrikna nanga ine Momin aganaha. Indake skatang matnange aro mandejatko bak ong·atna kattarangko aganana batede a·doktangni nangarangko nambate niroknasa nanga ineba Momin aganaha. India damsa democratic a·song ong·ani gimin manderangni palo dilgipako seokna maming kenani gri aro darangni didianiko man·gija jakgitel ong·e seokna bil gnang.
Meghalaya, Manipur aro Nagaland a·dokni manderangrangni fundamental rights ko ja·rikgija indakgipa kamrangko ka·aniko maming dakeba ra·chakna man·jawa ineba Momin aganangaha.Meghalaya, Nagaland aro Manipur a·dokrangni mondolirang pangnaba politics-o bakko ra·giparang ong·ja aro indake politics-o bak ra·genchimode Sarma aganku·pattina man·genchim ineba Momin janapataha. Apsan daken dilgipako seokanio pangnan Indian Constitution-ko, chol on·anirangko aro mande sakantiko naljokatnagipa jean jat torom basegijagipa dilgipakosa seoka ine Momin aganangaha. Sarma-ni indake Christian toromko ra·e manderangko bak ong·atna jotton ka·anina manderang maming dakeba jajajawa aro je party ba candidate mande sakantini bil aro jakgitelaniko mande ra·na changgijagiparangna maming saloba chakpaaniko on·jawa ine Momin raken u·iatangaha.
Sarma-ni ra·chakna man·gijagipa kattarangko agananina Meghalaya, Manipur aro Nagaland-ni manderango kemako bi·chinaba u·iatangaha. Una agreba democratic a·songni manderang ong·e sakantini jakgitelaniko aro bil gnanganiko mande ra·e kam ka·gipa dilgipakosa seokgen aro je mandean party-tangni namgninasa chanchiaigipa aro manderangko bak ong·atna jotton ka·gipa dilgipako nangja ine Momin agandapangaha.
