2024 Lok Sabha Election-o BJP party-ni dilanichi National Democratic Alliances (NDA) bang·bata MP-rangko man·e India a·songko chalaitaina, Prime Minister Narendra Modi gittamgipa changna ku·mitchetaniko June 8 tariko dakangna tik ka·angaha. Ian BJP baksa bakrimgimin NDA-ni gittamgipa changna India a·songko chalainagita re·mikkangani ong·enga.
Ia LS election-o BJP sak 240 seat-rango chegipa ong·an baksana NDA-o bakrimgimin party-rang sak 53 MP rangko man·aha. Apsandaken Congress-ni dilanio INDIA Bloc sak 234 MP-rangko man·aha jeon Congress-ni sak 99 aro bakrimgimin party-rang sak 135 MP-rangko man·angskaaha.
Iani gisepon NDA 3 gipa changna ma∙mong Sorkariko chalaina mijal attamo PM Modi-ni dongchakram noko tom∙e chanchirimangaha. Ia tom∙anio Chandrababu Naidu-ni party Telugu Desam Party (TDP) ge 16 seat-rango chegipa aro Nitish Kumar-ni party Janata Dal JD(U)ge 12 seat-rango chegiparangba bakko ra∙angaha. TDP aro JD(U) o chu·gimik sak 28 MP rang gnang aro ia dolgnian da∙o BJP baksa bakrime sorkariko rikna nangchongmotgiparang ong∙enga.
Indake ong∙engon Chandrababu Naidu ma∙mong sorkariko rikanio Lok Sabha-ni Speaker baksana Union Minister-rangko on∙chinagita dabianiko dakangenga, apsandaken Nitish-ba sak 5 Union Minister-rangko on∙china dabiangskaenga ine u·ina man·angaha.
NDA ia chang 18 gipa Lok Sabha sorkariko rikna CEC Rajiv Kumar baksana EC Gyanesh Kumar aro Sukhbir Singh Sandhu, NDA-o bakrimgimin MP-rang baksa India-ni President Droupadi Murmu-ko da∙al attam-ni gisepo grongna tik ka∙angaha.
