East Garo Hills Williamnagar-oni km 15 mang chel·ao ong·gipa Akelgre songni Balchol A·bri-ni Manda Nokpante-o, Soil and Water Conservation Department-nigita World Environment Day-ko maniangaha. Ia manianio buring bolgrimko jelataina, ding·karini somoio chiring chibisikrangni tipchangaoniko champengna aro ding·ani batroroengaoniko naljokatnagita miksonganio pangchake ong·atangaha.
Ia manianio PHE Minister Marcuise N. Marak-ba dongpae bako ra·angaha jeon ding·ani batroroenganiko champengna aro chiring chibisikrangko tange rakkina dingtang dingtang ja·kurangko de·e buring bolgrimrangko ripingna aro bariatna bang·a project rangko sorkarinigita tangka gong 340 crore-rangko chamate ra·baenga ine aganangaha. Unbaksana bol wa·arangni bon·anganina sorkarikosan matnangaigija batesa ku·cholsan bakrime ripingna aro songantian bolrangko susaa gnang ge·angna ine ku·mongange didiangaha.
Buring bolgrimrangko ripingna ja·kurangko de·e manderangna mikrakataniko on·enganina Soil and Water Conservation Simsanggre Division-ni Divisional Officer (DO) ko East Garo Hills-ni Deputy Commissioner Vibhor Agarwal mittelangan baksana mikkangchiba kamrangko ka·angkuchina didiangaha.
Ia man·ianio Williamnagar Manda Mahari Association-ni Jillipson M. Sangma Manda Nokpante-oni Akelgre songni nikwatgipa-ona re·gipa ramako taridape on·china mol·molangaha maina ian niwatramoni Williamnagar songjinmako nitobee niwatate rona nambegipa biap ong·a ine aganangaha.Una agreba a·jani Deputy Commissioner Vibhor Aggarwal, PHE Minister Marcuise N. Marak baksa skul-ni bi·sarang, songni dilgiparang Manda Nokpante-ni samtangtango bol bi·sarangko ge·angaha.
