Gitalgipa Rongjeng Model Degree College-o admission on·a Education Department-ni mijalo parakataniko Rongjeng Regional Unit-ni AHAM dolrang jegalataha. Ia gitalgipa college-ko nirokna dilgiparangni aro PAC Committee-ni, Education Minister Rakkam Sangma baksa NGO-rang aro songdongenggipa manderangni dongpaanio niroknagita ku·chakgiminko chu·sokatgija ia bilsioni admission-ko on·anina raken jegalangaha.
Ia gitalgipa college-ko rika cho·anirang namen namgijagipa ong·anina poraienggipa chatro chatri aro skigiparangna kenchakani ong·enga jekon college-ni obostako nirokatchenggija chalaina am·aniara kragipa ong·ja ine AHAM dolrang janapataha. Unbaksana ia college-ko chalainagita da·onaba managing committee, Principal, skigiparang aro college-o kam ka·nasigiparangkoba rimnapaniko dakkujani giminba sing·doangaha.
Rongjeng Model Degree College-o admission-rangko a·bachengatna skang name dake nirok sandianirangko dakchengchina AHAM dolrang didiangaha. Ia College-o poraienggipa chatro chatrirangna mikkangchi mamingba neng·nikanirangko ba a·sel obostarangko chagrongna nangjanagita kakketgipa am·sandianirangko dake name nirokangchengchina mol·molangaha.
