Ranikor-Maheshkhola-Baghmara State Highway-ni Maheshkhola-oni Kanai-ona dakanggipa 24.155 km ni ramako apalatna a∙dok sorkari pilak nanggipa niamrangko ja∙rikesa SARDPNE ‘Phase-A’ ni ning∙o kamrangko ka∙angna miksonganiko Public Work (Roads & Buildings) Department u∙iatangaha.
Ia project-ko ka∙na manchianiara da∙o dongsogimin ramako apalatnasa ka∙enga aro indita bilsina donchipgipa ramako namdapatna miksongesa tarienga ine PWD janapataha. Maheshkhola-oni Kanai-ona dakanggipa ramarang Balpakram National Park (BNP) ni a·arangko man∙chapani gimin Forest Conservation Act 1980 aro Wildlife Protection Act 1972 niamo pangchake chu∙gimik ja∙rikna nanganirangko ja·rikesa kamrangko ka∙na miksonganikoba talatangaha.
National Park aro Wildlife sanctuary-ni a∙ao ga∙akgipa ramako dal∙dapatna aro matburingrangni dongchakram biaprangko rika cho∙ani kamrangna jakkalnagita National Board for Wildlife (NBWL) ni Standing Committee-oniko hukumko pangnan ra∙na nangchenga. Uandake ia nanggipa niamrangko ja∙rikesa NHIDCL-na NBWL-ni Standing Committee jean Ministry of Environment, Forest and Climate Change (MoEFCC) ni ning∙o pangchakesa kam ka∙na raiko on∙angaha ine u·iatangaha.
NBWL-ni raiko on∙genchimoba ramako tarianio matburingrangna neng∙nikaniko ra∙bajachina dongimin niamrang gnang aro iano pangchakesa kamrangko kan∙a man∙a ineba u∙iatangaha. Ia a∙arang BNP jolo ga∙akgenchimoba NHIDCL ia project-ko ka∙na Wildlife Protection Act 1972 aro Court-ni dongimin niamrangko ja∙rikesa ka∙angenga ineba talatangaha. Ia rama South Garo Hills-ni dilsa nangchongmotgipa ong∙e namdapatna nangtelanikoba uamang janapangaha.
