Re·anggipa bilsio a·doko kam man·gija dongenggipa nurse-rangna Overseas Nursing Job Fair-ko State Convention Centre, Shillong o ong·atanggipao a·dokni adita nurse-rang re·bae an·tangtangni bimungrangko segatangtokaha. Iano segata man·gipa nurse-rang training-rangko matchotgiminrangoni sak 27 nurse-rang Japan-o aro sak 18 nurse-rang Singapore a·songo kamrangko ka·na seokako man·angaha.
Ian a·dok sorkari-nigita a·doko kam gri dongenggipa chadamberang-na gipin a·songrango kam ka·na namgipa cholrangko ra·bae on·ani ong·enga.
Chief Minister Conrad Sangma ia seokako man·e Japan-ni Kobe Kaisei Hospital-o kam ka·enggipa nurse sakgniko gronge golpogrikaniko dakangaha. A·dok sorkarinigita mikkangchi sak hajal 1000 na bate nurse-rangko gipin a·songrangona kamrangko ka·na cholrangko on·e dakchakangnaba Chief Minister aganangaha.
