Tura songjinmao, cycle salsuaani Cyclethon-ko Meghalaya Grassroots Music Project, Meghalayan Age Ltd. aro Art Sourced bakrime da·al salo ong·atangaha. Ia Cyclethon-o bakko ra·na Garo Hills-onisan ong·aigija Meghalaya a·dokni dingtang dingtang bakrangoniba re·bae susaangtokaha.
Cyclethon-o salsusaanio skanggipako Eastern West Khasi Hills-oni Kevinjohn Khyllait, gnigipako East Jaintia Hills-ni Lambormi Phawa aro Eastern West Khasi Hills-oni Alancemayer Lyngdoh Nonglai man·angaha. Ia susaanio skanggipa ong·gipana hajal 25, gnigipana hajal 15 aro gittamgipana hajal 10 tangkarangko on·a tik ka·angaha.
Cyclethon-ko da·al pring 5:30 bajimango a·bachengataha aro chu·gimik km 16 ko salatangaha. Ia somoio pilak bilsini chadamberang aro bilsi 64 ong·gipa pagipa saksani bak ra·anikoba nikangaha. A·chikrangni gisepo sports-ni cycle ong·gijako salgipa aro bike-ni helmet-ko gane salsusagipaba 5 gipa gadango cheangaha.
