Tura GBHSS-ni football kal·chakramo District Football Association (DFA) ni ong·atenggipa Tura Football League 2024-ni Division A aro Division B ni dolrang da·al salo susaangaha. Skanggipao, Division B ni kal·anio Ganolgre Sports Club goal 2-1 chi Nostu Nopantu SCYC-ko amataha. Uamang kal·susaanio dolgnian bilakbee susaanganiko nikangaha aro dolsa dolgipinni kosako chegipa ong·na jotton ka·angaha. Bon·kamao, Ganolgre Sports Club dolni Lenicare R. Marak aro Pringseng T. Sangma-ni goal prakko chipanichi uamangni dolko chegipa ong·na dakchakaha. Nostu Nopantu SCYC doloni Nyangku M. Sangma saksa kamkam goal 1 ko chipna man·angaha.
Gnigipa kal·aniko Division A ni dolrang Spirit FC aro Greenwood-ni gisepo susaangskaaha. Ia susagrikanio Greenwood dolni Gadiel kal·a a·bachengani minute 7-on doltangna skanggipa goal-ko chipe on·aha. Apsandaken, Sengsu Momin aro Chekam Marak, Greenwood-na goal prakko chipe doltangko amdilangaha. Spirit FC-na Sengmath R. Marak, goal 1 mangmangko chipe on·a man·aha aro uandake da·alni kal·anio sirikaha.
