Social Activist Cherian Momin, Balpakram National Park ni 2.548 a·arangko Maheshkhola oni Kanai ona highway ramako tarina sorkarini tik ka·aniko jegalataha. Balpakram damsa A·chikrangni daka rikako bebe ra·e tangkame rakkibaenggipa aro gamchatbegipa biap ong·a. Sorkarini Balpakramko rama tarina am·enganiara jatni dakarikako mande ra·gijasan ong·aigija, jatna on·gimin bilkoba on·chepani ong·a ine Momin parakataha.
Ia kamchi, Balpakramo dongkamgipa jonturangkoba nosto ong·ataniona ra·bagen aro uamangni janggi tanganiko rusiatani ong·gen ine Momin janapataha. Ramarango matburingrang baksa gari gorarang chatinggrike a·sel ong·anichi uamangni janggirang gimaani batroroenganiko an·ching nikna man·enga. Rika cho·ani kamrangchi aro jabolrangko skatang galanichi a·arangko rurongatan baksana sepang jolo donggipa chibimarang jekai Kanai chibimako mitchiatgen ine Momin aganangaha. Unbaksana, bolrangko den·peani aro matburingrangko so·otani batrorogen ineba Momin parakataha.
Dikdiksani man·gnina ramako tarianichi, ia buringo janggi tanganiko nosto ka·kamani ong·gen. Balpakramko rusianiara tourism-ko aro ia biapko ripingna jotton ka·ani kamrangko galonani ong·an baksana naljoke rakkienggipa buringni bimungko gimaatgen ine Social Activist parakataha. Iasan ong·aigija mande aro matburing baksa nanggrikanirangba batrorogen ine Momin janapataha.
Forest & Wildlife department ni Commissioner & Secretary, Pravin Bakshi, Wildlife Protection Act 1972 ni Section 35 ni Sub Section (6) ni ning·o donggipa bilko jakkale National Board for Wildlife ni Standing Committee baksa tom·anichi Meghalaya ni Chief Wildlife Warden ia kamko ka·na pakwatataha. National Board for Wildlife ni Standing Committee changni changni nosto ong·ataniko komiatchina ku·pattiahaoba Balpakramko rusiatani mongsonggipa kamko niata dongkuja ine Momin parakataha.
A·chikrangni bebe ra·aniko aro Balpakramni ning·tugipa mikkimko nosto ka·gija namgipa cholko ra·bana man·agita ia kamni bidingo chanchipiltaie sorkari songdongenggipa manderang baksa agangolpogrikna nanga ine Momin parakataha. Ma·gitcham pagitchamni bebe ra·e rakkibaenggipa biapko nosto ka·ode jingjengatanirangko aro jegalanirangko nikanggen ine Momin aganangaha.
Bola wa·ako ripingani palo dingtangatani kamko ka·na seokaniara mikkangchina namgijagipa dakmesokani ong·a. Dikdiksani man·gnina chanchigija ia biapko baikame aro tangkame rakkina janggi tanganiko nosto ka·gija bakrogipa cholrangko sorkari ra·bana nanga. Balpakramni a·bri a·kongrang, tosokgijagipa buring bolgrimrang aro bilakgipa chibimarang, janggi gnanggiparangnasan ong·aigija A·chik jatni dakarika aro bebe ra·anioba name gamchatgipa ong·a ine Momin aganangaha.
