Tura ni MDC Bernard Marak, Garo Hills o songdongenggipa tribal manderangna Schedule Tribe (ST) certificate-ko GHADC nigita on·china mol·molaniko dakangaha. Ru·uta bilsirangonin da·ona kingkingba Garo Hills ni manderangna Scheduled Tribe Certificate-ni palo Caste Certificate-kosa on·e jakkalatenga ine GHADC-ni Secretary-na Marak chitti see janapataha.
Garo Hills-o Autonomous Council donggenchimoba tribal-rangna Deputy Commissioner-sa Caste certificate-rangko on·enga ine Marak parakataha. Sixth Schedule donggipa biaprango Schedule Tribe certificate-ko DC on·a man·ja aro indake dakaniara A·chik jatko gimaataona ra·baani ong·gen ine Marak aganangaha. Autonomous District Council donggijagipa biaprango aro general category-nasan ST certificate-rangko DC nigita on·a man·aia ine Marak janapataha.
Constitution o A·chikrangna on·gimin bilko jakkale Garo Hills-o songdonggipa manderangna GHADC-nigita Scheduled Tribe certificate-ko tarie on·china Marak mol·molangaha. Unbaksana, atchiani aro siani certificate-rangkoba GHADC nigitan on·china janapataha aro a·dokni jako on·jachina Marak didiataha. Sixth Schedule ni biaprango Primary health centre-rangara GHADC ni ning·osa ong·a aro da·onaba a·dokna jako ra·na pakwata dongkuja ine Marak aganangaha.
Una agreba Civil Hospital, Medical College, Child & Maternity Hospital aro Wellness centre-rangko Sixth Schedule-o pangchakesa chamatenga ineba Marak agandapangaha. Ia gimikkon nigrike Garo Hills-o songdongenggipa manderangna constitution-ni niamo pangchake Autonomous Council-na on·gimin bilrangko jakkale Birth aro Death certificate rangko tarinagita nirokatchina mol·molataha.
