Ia bilsini Class XII pass ka·giparang aro Ampati Degree College-ni final year ni chatro chatrirangna Tura ICFAI University Career Counselling aro NEP 2020 ni bidingo awareness program-ko Springfield Higher Secondary School, Ampati-o ong·atangaha. Ia program-ko ong·atani miksonganiara mikkangchi chatro chatrirangna poraiani a·bao namgipa cholrangni bidingo ma·siatna aro uamangni basegimin ramarango chu·sokgipa ong·china ong·atangaha. Unbaksana NEP 2020 ni bidingo nambate u·i ma·sie ra·china ning·tue agantalatangjolaha.
Ia program-o Springfield School aro Ampati Degree College-ni chatro chatrirang chu·gimik sak 156 bakko ra·angaha. Career Counselling Program-ko Tura ICFAI University-ni sapgipa skigiparangni dilanio, chatro chatrirangna poraiani a·bao uamangni gisik nangani, bil aro miksonganio pangchake mikkangchi ja∙kurangko de∙angchina saksa sakgipin baksa golpogrike skie ra∙angna cholko on∙angaha.
Program-ni bako dingtang dingtang cholrangni bidingo jekai tang∙dobaenggipa industry-rango, entrepreneurship aro business-ni a∙bao bimchipe skie ra∙e u∙i ma∙sie ja∙ku de∙angchina, Dept. of Management-ni Asst. Professor Dr. Brenda D. Marak uamangna gamchatgipa ku∙pattianirangko on∙angaha.
NEP 2020 aro IT industry-rango nanggipa skie ra∙anirangko man·agita aro NEP ko ma·mong sorkarini ra·gate poraiani a·bako nambatatani bidingo IT Dept. ni Asst. Professor Sumit Dey aganangaha. ICFAI University-o dingtang dingtang a·bao aro gadangrango porainagita chol gnangananiko Meghalaya-ni Senior Administrative Officer, Muktadul Hussain aganangskaaha. Una agreba indakgipa counselling program-rangko aro chatro chatrirangna mikkangchi poraianiko basee ra·ani rama ba cholrangko aganskie on·angahanina Springfield Higher Secondary School-ni Principal Alno A. Sangma mittelpilani kattarangko aganangskaaha.
Indakgipa program-rangko ong·atanichi mikkangchi chatro chatrirang an·tangtangni namnikgipa course-rangko basee ra·e chugipa gadangrango porainagita cholko man·angan baksana nambate u·i ma·sie ra·na namgipa aganskie on·ani ong·a.
