North Garo Hills a·jani Kosi aro Bajengdoba bajar antirango gipin jatrangni dokan dakgipa manderangoniko Trading for Non-Tribals (TNT) aro minggipin lekka pancharangko GHADC ni dilgiparang mijal salo nirokeaniko dakangaha.
Ia sing·sandianiko dakani miksonganiara A·chik a·songo gipin jatrangni skatang napdrabae antidamrango bading chiwalna nengrae man·aniko niroknagita dakangaha. Indake Garo Hills ona uamangni niamgri napdrabaaniko champengsona man·agita uamangoniko dingtang mancha TNT license rangko am·e nirok sandianiko dakangchina ge·etangaha. Unbaksana niamo pangchake aro nama bewalo bading chiwalaniko dakchinagita GHADC ni dongimin niamrangko ja·rikan baksana TNT license rangko on·ange nirokaniko dakchinaba aganangaha.
Ia am·sandianio GHADC ni CEM Albinush R Marak, Dy CEM Nikman Ch Marak, Executive Memberrang aro office staff rang dongpae nirokaniko dakangaha.
