South Garo Hills o Awegre Water Supply Scheme ni ning·o ga·akgipa biaprangona Nokrek Area Development Committee, Sub-Divisional Officer aro contractor Samrat Rabha baksa Jal Jeevan Mission (JJM) ni kamrangko re·ange nirokeaniko dakangaha. Uamangni nirokaniko dakon Awegre Water Supply Scheme-ni ning·o man·gipa songrango chong·motan Awegre, Anchigre, Rongdigre aro Rongchangreo JJM project ni kamrang matchotgija bang·kuenganiko nikangaha. Ia songrango ge 80 mang JJM ni chirangko man·a kragipa nokdangrang donga ine u·iataha.
Rongchangre aro Rongdigre songona re·ange nion chi brachakna rikgipa tank ko name rikgijaniko nikaha aro dam-koba tong·sakosan ka·e da·on nosto ong·aniko nikna man·enga ine u·iatangaha. Apsan dake, Anchigre songo tank aro damko rikmanahaoba nokdang ge·saba ringna namgipa chiko man·kujaenga ine parakataha. Ia songrango JJM ni kamrangko bang·bataon matchotkujaniko aro ka·gimin kamrangni nosto ong·aniko nike ia kamko jako ra·e ka·enggipa contractor Samrat Rabha taridape on·a ku·chakangaha ine Nokrek Area Development Committee parakataha.
Ian skanggipa ia jolni songrango sorkarini chi sale on·ako man·chengani ong·gen maina skangode chiringrangonikosa chi koe jakkala ine uamang janapatjolaha.
