Assam aro Meghalaya-ni sima ari jolo Tikrikilla-ni ning·o ong·gipa Dabangpara/Nagor gau songrango a·ani bidingo kajia golmalrang ong·rongenganiko nirokna Enquiry Commission-ko songe on·chinagita Niksamso Garo Community Organisation (NGCO) H.Q. Simsanggre, GHADC ni Executive Member, Land & Revenue Incharge-na chitti see mol·molataha.
Uamangni chittio u·iatanigitade, tribal jatrangni a·arang jean Tikrikilla A·king Nokmani ning·o ong·a aro GHADC-ni jako ga·akgipa biaprango Assam a·dokni non-tribal rang napdrabae songdongenga ine u·iatangaha. Indake gipin a·dokoni napdrabae Meghalaya a·dokni a·arango songdongengani gisepon bang·a changon a·ani bidingo kajia golmalrang ong·e kenbegni ong·rongenga ine janapataha.
Indake janapgimin songrango ong·rongenggipa kajia golmalko tom·tomaona ra·bana aro kakket raiko on·a man·agita, Enquiry Commission-ko ta·rakkale songe on·e nirokatchina NGCO dolrang mol·molangaha.
