Niamni a·palo kamrang ka·aniko nirok simsakenggipa BSF dolrang, Meghalaya Pulis baksa bakrime May 21 tariko am·sandianirangko dakanio, South Garo Hills a·jani Rongara songoniko bang·a chini aro gue granrangko rim·nagita man·angaha ine koborna parakataha.
200 Battalion BSF dolrangni Meghalaya Pulis baksa bakrime Indo-Bangla sima ariniko rim·a man·gimin chinirangara chu·gimik 7,050 Kg aro gue granrangara chu·gimik 6,050 Kg mangnigita ong·a ine janapataha. Ia man·gimin chini aro gue granrangko Bangladesh sima arini sepango galchipgimin nokoniko man·aha ine pulis dolrang janapataha.
Ia man·gimin bosturangko Rongara Pulis Station-ona ra·angaha aro ia mamlani bidingo nambate am·sandianiko dakangenga ineba u·iatangaha.
