Adita salrangna skang Director of Health Services (MI), Shillong songjinmao May 22-24 tariko aro Tura-o May 22-23 tarikrango nurse-ni kamna contractual basis-o rimnapna walk-in-interview ong∙atna manchigiminko dontongataniko u·iatangaha. Unbaksana ia dontongataniko gital tarikrangko tik ka·kujana kingking dontongatangkugen ineba parakataha.
Election Commission of India-ni rai on∙aniko man∙e, www.meghealth.gov.in website-o interview on·a kragipa candidate-rangni bimungrangko DHS (MI) parakatmanani ja·mano KSU dolrang, je candidate-rangni bimungrangko interview-na seokangaha, uarang sorkarini ning·o kam ka·enggiparangni bilo pangchake seokgiparangsa ong·a ine jegalataha. Indake nakatgimin bimungrangko name nipiltaichina KSU dolrangni dabiani a·selo interview-na manchigimin salko dontongatna nangaona sokaha.
KSU rangni agananigitade, je candidate-rangni bimungrang nakataha uamang kamna kragipa ong∙ja aro jemangni bimungrang nakatjaha uamangoniba kamna kragiparang bang·en donga ine matnange aganangaha. Apsan daken nakatatgimin bimungrangko nipiltaian baksana interview-ni somoio maming dakeba bil gnanggiparangni dakchakanio pangchakgija kragipa candidate-rangkosa seokaniko dakna nanga ine KSU dolrang dabiangaha.
