South Garo Hills, Gasuapara jolni Bangladesh sima ari jolo mande saksako mijal attam mangni somoio mongma kal·ake siataha. Sianggipa mande South West Garo Hills, Mahendraganj ni Melapara songoni Ajit Kr Hajong ong·a ine u·iataha aro ia a·selo jangnanggipa mandeko sko tik ong·gijagipa ineba parakataha.
Ia ong·a obosta mande saksani buringko re·angmiting apsan somoio jaksa mongmarangni sima ari jolniko cha·ani sandiangmitingo chagronge a·sel ong·angaha. Koborko parakatanigita ia mandeko mongma dal·begipa bipa mangsa rikpangpilaha aro ga·rineke so·otaha ine parakataha. Uni manggisiko a·damoniko ra·bae post mortem ka·na watataha.
Ian Garo Hills o gittamgipa changna mongma kal·ake siatgipa ong·a aro apsandake batanggimin changoba Selsella o cha·ani sandigipa jaksa mongmarang baksa cycle o re·angenggipa mande ramao chagronge janggi gimaataha. Buringrangni bon·angani a·selo aro matburingrangni dongchakgiparangko nosto ka·e re·ronggipa ramarangko gimaatanichi mande baksa mongmani nanggrikanirang batrikrikenga. Re·anggipa salrangoba mongma baksa nanggrike Garo Hills o bang·a manderang janggiko gimaatna nangaona sokanikoba niknagita man·angaha.
