Ma∙mongni Education department-oni Meghalaya a∙doko dam gittam centre-rang jean Tura, Shillong aro Jowai songjinmarangko songe on∙anichi, chatro chatrirang an∙tangtangni porikkako ia chango a∙doktangon sena cholko man∙engaha. Tura songjinmaba damsa centre songako man∙e Garo Hills-ni chatro chatrirangna skanggipa changna sechakani biaprangko ge 10 college rangko seokange ia bilsini CUET-UG porikkako da∙aloni seatenga. Re·anggipa salrangoba apsandaken NEET porikkako skanggipa changna a∙doko chu∙soke sena man·angaha.
Porikka seenggipa chatro chatrirang baksa golpogrikaniko dakon, Tura-o ia centre-ko ra∙bana man∙ani bidingo adita namgnirangko parakangaha. Bang·a chatro chatrirang gipin biapchi re·na nanggija a·doktango sena man·e re·a doani korosrangko komiatan baksana gisiknigitaba an·seng baljoke tarisamsona man·aniko parakangaha. Indake a·doktango sena cholko on·aniara gisiko nanggipa chadamberangna altua cholko on·ani ong·a aro nambata gadango chu·sokgiparang ong·na mikkangchi dakchakani ong·gen ine uamang parakangaha.
Re·anggipa bilsi gnio Meghalaya a·doko CUET porikkako sena centre-rangko pakwatanio neng·nikaniko man·e dontongatna nangao ga·akaha. Chol ong·gipa nokdangrang gipin a·dokrangchi an·tangtangni bi·sarangko porikka sena watatna man·genchimoba donggijagipani nokdangrang bang·bataan serikna man·tokjaha.
Ia chango a∙doktangon CUET aro uandakgipa porikkarangko sena man∙anichi bang∙a chadamberang adita koros bon·a nangaoni naljokna man∙aha. CUET porikkako da∙aloni May 18 tarikona offline mode-o Meghalaya a∙doko seaniko dakangenga.
