France-ni mingsinggipa Capricci Cinema aro Anna Films Shillong nangrime, Dominic Sangma-ni tarigipa Rapture ba Rimdogittanga jawilwatko, France a·songni dam 100 na bate theatre-rango mesoknasienganiko parakataha. Sangma-ni tarigipa jawilwat, Meghalaya a·doko jawilwat tariani itihaso skanggipa changna French cinema-o chu·sokaniko man·gipa ong·enga jean a·gilsak gimiko Garo cinema-ko niksengatgipaba ong·a.
Anna Films Shillong-ni dakchakaniko man·e, ia jawilwatni dingtanggipa golpo, jatni daka rikako ning·tue mesokani aro A·chikrangni bebe ra·aniko dakmesokaniko nike bang·a manderang ia jawilwatko namniktokaha. Ia chu·sokanian Dominic Sangma-ni bimchipani aro changa sapaniko mesokani ong·a.
Rapture jawilwat A·chikrangni ning·tugipa daka rikanikosan mesokaigija, India a·songni cinema-koba a·gilsak gimiko niksengataniko ra·baaha. A·song ge·saoni aro jatsa jatgipinni daka rikaniko skie ra·na France ni Capricci Cinema aro Anna Films Shillong namgipa re·mikkanganiko dakenga aro Rapture jawilwatni golpoko ma·sie ra·china manderangna mesokangenga.
