Dainadubi-oni Karonggre-ona re·gipa National Highway ramao donggipa songrangni bimungrangko ma·sinagita chinrangko tapanio kakket bimungko tape donchina Nongalbibra-ni ACHIK Regional Unit dolrang National Highway Division-ni Executive Engineer-na chitti sedoataha. South Garo Hills-ni ning·o ga·akgipa National Highway-rango gittimrangni bimungrangko sesretani a·selo songre songgabatgiparangna neng·nikanirang ong·rongenga ine ACHIK dolrang u·iatangaha.
Indake gittimni bimungrangko kakket ong·gija tapaniara chonbegipa neng·nikani ong·oba songni ba gittimni bimunrangko ma·sisreatataniona sokatronga. Unbaksana gittimni bimungrangko kakket ong·gija sesretaniara jolni dakbewal rikbewal ba aganrongbewalko jajaataona sokata jeon basakobade badingchiwalanirangoba neng·nikanirangko chagrongna nangronga ineba ACHIK dolrang janapataha.
U·ina dongipa chinrango tiktak ong·gipa bimungrangko tapanichisa songdongkamgipa manderangna, grongna re·bagipa aro songregipa manderangnaba nambate u·ianiko on·a dakchakani ong·gen ine janapatan baksana ia chonchongipa sesretanirangko tik ong·e see chinrangko donchina Nongalbibra ACHIK Regional Unit mol·molangaha.
