Garo Hills-o Jal Jeevan Mission (JJM) ni kamrangko ka∙anio chabokenga ine adita matnange agananirangna PHE Minister Marcuise Marak talatanga. A∙doko JJM project-ni kamrangko namen chu·sokgipa ong∙e matchotatna man·an baksana kamrangko ka∙anio maming togiani dongja ine da·al salo Marak aganangaha.
JJM ni kamko ka∙anio sorkarioni seoka man·gipa nirokgipa dolrang skanggipa pilak JJM project ni kam ka·giparangona re·ange kamrang matchotaniko parakatani ja·manosa contractor-rangna tangka paisarangko gamenga ine Marak aganangaha. Uni gisepon adita matchotkugijagipa JJM project-rangkoba nirokaniko dake a·bachengatangen ineba Marak aganangaha.
Garo Hills-ni JJM project-rangko jakgitel am∙sandiako dakani bidingo sing·on, da∙o dipet hajal 4 project-rangna baten donga aro badia project chu∙sokjaenga ba togiaha uarangko am∙sandianiko nangenga ong∙ode re∙bae aganechina Marak aganangaha.
PHE Department-o gegni project-rangni bidingo matnanganirangko man·soaha, skanggipa Assam a·dokni sima ari jolo ga·akgipa biapni ong·a jekon Deputy Commissioner aro Secretary-rangko nirokatchinaba ge·etangaha ine Marak u·iatangaha. Gnigipao, joltangni MLA contractor an·tangni kamko ka·gija galchipe donenga ine u∙iataniko man∙e, department am·sandianirangko dakchina ge·etangaha, aro kakket ong∙genchimode contractor-ni kosako mikrakataniko on·e una on∙gimin kamko ra·galna gitaba aganangaha.
Apsan dake re∙anggipa Assembly session-o MLA-rang JJM ni chi watanirang tik ong∙jaenga ine u∙iatani bidingo Officer-rangko nirokatchina gita ge∙etaha aro Model Code of Conduct ko ra∙galani ja·man nipiltaianiko dakangen ineba Maraka aganangaha. Mamong sorkarinigita nokantiona chi piperangko sokatna ia bilsini March 31 tariko tik ka·genchimoba a∙doko chu∙sokna man∙jaha aro ia bilsi August jao matchotatna gita ma∙mong sorkario somoirangko bidapaha ine Marak aganangaha. Ia projectko somoigita matchotgijani a·selara a·a man∙jani a∙sel, Nokmarang-ni neng·nikani aro contractor-rangni kamrangko galchipe don·ani gimin ong·aha ine aganangaha.
