Ma·mong sorkarini ge·etgimino pangchake a·dokni Food and Civil Supplies and Consumers Affairs ni Director pilak a·jarango jemangan National Food Security Act (NFSA) ni namgniko man·e Aadhar card dongkujachim uamangko sepangbatgipa Aadhar enrollment centre ona ba Supply department ni biming segate on·gipaona re·ange an·tangna aro nokdangni manderangna Aadhar card ko tarie June jani 30 tarikna skang NFSA card baksa link ka·china Tura ni District Commissioner (Supply) u·iatangaha.
Apsan daken pilak AAY aro PHH nigita namgniko man·enggiparangko an·tangni aro nokdangni manderangni Aadhar card-rangko xerox ka·e Fair Price Shop ona ra·ange on·chinaba didiangaha.
Ia kamrangko ka·anio WGH Tura ni Supply Inspector-ko nirokchina gita ge·etangaha. Iako dakaniara sorkarini a·dokni manderangna cha·a ringanirangko sualanio nambate kamko ka·e on·a cholko ra·ani ong·a ineba u·iatangaha.
