Williamnagar songjinmani Nengmandalgre songoni Mandalgre songona dakanggipa dolong jekon PMGSY scheme-ni ning·o J. C. Infra Corporation Limited Company tik ong·gija tarienga jean matchotna skangan bretanirangko nikna man·enganina jolni manderangni u·iataniko man·e EGH A·chik Progressive Approach (APA) dolrang biapona re·ange nirokeaniko dakangaha. APA dolrangni re·ange nianiko dakon dolongni be·sreaniko aro mittam bakrangko algatrachi nonge donuna jotton ka·aniko nikenagita man·aha ine APA dolni President Francis Marak koborna parakataha.
Ia dolong mikkarang wana a·bachengahaode ta·raken be·gropgen aro iasan ong·aigija bang·a dolongrang aro ramarangko tarianio kam namgijani dongkuenga ine Marak janapataha. Indakgipa Company ba contractor rangni kamrangko tik ong·e ka·gijaniara, Garo Hills-ni silroro namroroanina tangka paisa chamatgiminrangko ong·gija jakkalsretani ong·an baksana ia kakketgijapa kam ka·anirangara tangka paisana mikboke an·tangtangni man·gninasa kam ka·aigipa ong·a ine Marak matnangataha.
Indakgipa kamrangko ka·aniara songdongenggipa manderangni bilsi 100 mangna batpile chakchike nama rama aro dolongrangko re·na man·agita jumang niksoaniko gimaatani ong·a ineba Marak janapataha.
Garo Hills-ni manderangna namgniko ra·baenggiparangko jakkalsretenggipa je company ba contractor rangni kam ka·anirangko nie dongna man·jawa aro ramarang, dolongrangko rika cho·anio nama namgijaniko dontonggija nirokangan baksana kakketgija ka·enggipa kamrangni kosako niamnigita Court-onaba sokatanggen ine Marak mikrakataniko on·angaha.
