Meghalaya-ni DGP L R. Bishnoi ni jakkalenggipa garirango kakketgijagipa registration number-rangko tape salenganina, namgijagipa kamrango jak dongna nanga ine pulisni kamoniko neng·takata man·gipa Gabriel K. Iangrai kakketgipa sakkirangko ra·bae badi ka·angaha.
July 18, 2022 tariko Enquiry Committee-rangni am·sandianirangko dake u·iatanigitade, Central Workshop-o donenggipa Hyundai Verna garini kakketgipa lekka pancharang dongja aro tol·gipa registration number-ko tape jakkalenga ine ma·sina man·aha. Indake ong·engon July 27, 2023 tariko RTI ka·aniode, tol·gipa number-ko tape jakkalenga ine aganani kakketgipa ong·ja ine jechakatskaaha. Ia garini bidingo tale ma·sinagita Meghalaya sorkarini Transport department-o sing·sandianiko dakanio Verna 1.6 VTVT gari registration number ML-02A 0001 DGP-ni bimungo ong·a ine u·iatangaha.
Unbaksana DGP L R. Bishnoi uni KIA Carnival Limousine jekon Assam-o register ka·gipa gariko, Verna garini number-ona bodole jakkalenga ineba u·iatangaha. Indakgipa kamrangko darangni bil on·agri ka·aniara gipin manderang baksa maiba namgijagipa kamrangko ka·na sriksrik manchiani dongna nanga aro togina miksonge dakani ong·an baksana manderangni ka·donganiko gimaatani ong·a ine Iangrai janapataha.
Una agreba Meghalaya a·doko DGP rang nanga kamrangna gariko jakkalna Lakh 12 na bate on·jani gisepon, uni jakkalenggipa garini damara lakh 40 mang ong·gipa gari ong·a ineba Iangrai janapataha. Ia aiao inmanpilgipa kamrangko ka·aniara sorkarini garirangko jakkalna on·gimin niamko pe·ani ong·a ine aganangaha. Ia mamlani bidingo DGP Bishnoi-ni kosako mokordomako ka·china aro jak donggiparangkoba niamrango pangchake kakket bichalona ra·bachina daito donggiparangko Iangrai didiangaha.
