Re·anggipa 2023 bilsini April 5 tariko Dorakgre L.P Skul ni Headmaster, Clever T. Sangma ko kamtangchina re·angmitting somoio Terot T. Sangma jekon Kaxetone ineba minga, ua uni dolrang baksa doke saknaatanina Rongsak Police Outpost-o mokordoma ka·angaha ine u·iatangaha. Indake skatang dosgriko dokanina mokordomako ka·manahaoba ua Outpost ni UBSI Changchang R. Marak am·sandianiko ta·rakatna ine doka man·gipa mandeniko tangka ra·an baksana da·onaba ia a·selni bidingo maming am·sandianirangko dakujanina, UBSI ni kosako Director General of Police (DGP) na mokordoma ka·angskaaha ine koborna parakataha.
Dosi dakgiparangni kosako am·sandianiko dake kakket bichalko ra·bae on·china miksonge mokordoma ka·genchimoba, Changchang Marak doka man·gipa mandeoniko changgnina kingking tangkarangkosa dabie ra·skaaha ine u·iatangaha. UBSI ni tangkarangko dabianina dokako man·gipa skanggipa change 2023 bilsini June 12 tariko songtang Chachatgre-o namchiktangrang aro abitang dal·batgipani mikkango gong 7000 ko gamaha aro gnigipa changna apsan salon Rongsak Outpost-ona re·ange uni jikgipani mikkango gong 5000 ko gamtaiaha ine mokordomao janapataha.
Tangka paisarangko gamani ja·manba UBSI ua a·sel ong·gipa biapona re·ange sing·sandianirangko aro maming see rakkianirangko dakjaha ine u·iatangan baksana iani bidingo Linina Ch. Marak, Lakesh G. Momin, Sonaram Momin, Dalik Ch. Marak aro Onan Marak mikrontangchi nikgiparang ong·a ineba Sangma janapataha.
Indakgipa kragijagipa kamrangko ka·aniara Police Department-na kratcha·aniko ra·baani ong·an baksana wilwilao songdongenggiparangni pulisrango ka·donganiko gimaataniba ong·a ine janapataha. Ia pilak obostarangko niate indakgipa manderangni pulis dolo kam ka·enganiko dontongatna kraa sastiko on·a nanga jedakode gipinrangba indakgipa kamrangko ka·na pa·sokjachina skiani ong·anggen ineba Sangma didiangaha.
