National Eligibility Cum Entrance Test (NEET) porikkarangko segipa chatro chatrirangni porikka seaniko nirokenggiparangni kragija dake on·gimin somoigita sena on·janina Ku·riping Magazine-ni Chief Editor Arcosh M. Momin uamangni kosako Chief Minister Conrad Sangma-na chitti sedoataha.
Ia NEET porikkako April 5 tarik Robibar salo ong·atanio Tura-ni damgni Exam Centre-rango indake kragija chatro chatrirangko dongimin somoigita porikkako sena on·jaha ine Momin janapataha. NEET porikkako senagita konta 3 minute 20 na chamgimin somoiko admit card-rangon u·iatani donggenchimoba, porikka seaniko nirokenggiparang konta 3 nasan senagita on·ani a·selo bang·a chatro chatrirangan ming 50 ba 20 sing·anirangko seatnagita man·jaha ine u·iatangaha.
Indake chu·ongagita somoiko porikkarango sena on·gijanian chatro chatrirangni mikkangchina niksamsoe jotton ka·aniko nosto ka·ani ong·an baksana ma·a paani koros bon·e dedrangko chu·sokatna jotton ka·aniko ra·onani ong·a ine Momin janapataha. Indake niamni kosako kamko ka·aniara Tura-ni damgni Exam Centre jean Tura Govt Boys Higher Secondary School (Centre code 330501) aro Captain William School Matchakolgre (Centre code 330503) rango ong·angaha ine u·ina man·aha.
Ia damgni centre-rango je chatro chatrirangan porikkarangko seahachim uamangko changsatai porikkarangko setaina chol on·piltaichinagita Ku·riping-ni Chief Editor, Chief Minister Conrad Sangma ko mol·molataha.
